China-in Australian journalist enthlatua puhna thubuai siamsak

China chuan hun eng emaw chen a hren tawh, Australian journaist Cheng Lei chu enthlatua puhna thubuai siamsak a nih thu a puang. 

Chinese-born Austra­lian, Cheng Lei hi Chinese state media outlet CGTN-a TV presenter a ni. Nikum August thla aṭang khan hren ni tawh mah se, kar liam ta Zirtawpni khan thubuai hi siamsak a ni chauh a ni. A thubuaiah hian Lei hi China sorkar thurukte ram dang hnenah pe leh hrilh ṭhinah puh a ni. 

China foreign ministry thupuangtu Wang Wenbin chuan nimina press con­ference a neihah Cheng Lei man leh thubuai siamsak a nih chungchang  hi sawiin, he thubuai ngaihtuahnaah Australia sorkar chu a inrawlh loh a beisei thu a sawi. 

Cheng Lei hi Beijing-ah kum eng emaw chen hnathawkin a awm tawh a, a chhungte erawh chu Australia-ah an awm thung. Nikum August thla khan chin hriat lohin a awm a, a hnathawhna hmunah pawh kal chhunzawm loin, a ṭhian leh chhungte pawn an be pawp thei lo a ni. Mahse China sorkar chuan a hnuah security thil avangin hren a nih thu a sawi a, an hrenna erawh a puangzar lo. 

A chhungte chuan hren a nihna chhan tur hi an hriat loh thu an sawi a, ram himna atana hlauhawm tur zawnga a awm an ring lo tih an sawi. Hun rei tak hren a nih hnuah, Zirtawpni khan an hren chhan hi sawiin, thubuai pawh siamsak a ni ta chauh a ni.