Israel PM-in West Bank-a in sakna tur lungphum a phum

Israel prime minister Benjamin Netanyahu chuan Ningani khan West Bank-a Juda-te chenna in sakna tur lungphum a phum a, in tam zawk sak belh a tiam bawk. 

Ramallah hmarlam, Beit El-a Juda-te in 650 sak tharna tur hi Israel sorkar chuan a lo pawm tawh a, Ningani khan lungphum hi phum a ni. 

Benjamin Netanyahu chuan a kaihhruai sorkar chuan in a la sak belh zel dawn tih a sawi a, "Kan tum ber chu Juda mite an ramah ngei an awm nghehna tura hmalak a ni, hmanlai aṭanga kan ram dik tak kan neih leh hi a ni," a ti.  Netanyahu hian July thlaa a campaign-a West Bank a tlawh khan, thlan tlin an nih chuan Juda-te chenna in chu sak belh zel a lo tiam tawh a ni. 

Israel-in Palestinian ram a luahsak, West Bank leh East Jerusalem-ah hian Juda mi nuai ruk vel an cheng mek a, Palestinian mi maktaduai 2.9 vel an awm bawk. 

Nilaini-a West Bank-a Israel sipai pakhat thah a nih chungchang pawh sawichhuakin, PM Netanyahu chuan anmahni beitute chu man ngei turin an zawng dawn tih a sawi.