Hong Kong-in dinhmun hlauhawm lam a pan: Lam

Hong Kong territory chief executive Carrie Lam chuan Hong Kong chu dinhmun hlauhawm lam panin a kal mek zel tih nimin khan a sawi.

Lam chuan tharum thawhna a kal zel chuan Hong Kong chu a dinhmun ngaiah a let leh thei tawh dawn lo tih sawiin, "Hong Kong society chu dinhmun manganthlak leh hlauhawmah a inbarh lut dawn a ni," a ti. 

Nimin khan Lam hi thuthar thehdarhtuten an kawm a, nawrh huaihawtte chu inbengdai tawh tura chahin a lung a chhe hial.

"Minute khat lek han ngaih­tuah chiang teh u, kan khaw­pui, kan inte hi han en teh u, khuarkhurum mawng nei loah in nawr liam duh tak tak a mi?," tiin a sawi hial a ni.

Hong Kong thuneitute hian thiam loh changte mainland China-a thawn theihna tur Extradition bill an pharh chu duh loin March leh April thla vel pawh khan nawrh tenau deuh chu huaihawt a lo ni tawh. Mahse hemi chungchanga nawrh lian tham rawn irhchhuak hmasa ber chu June 9 kha niin, mi 2,40,000 vel zetin Extradition bill duh lohna kawngzawh hi an nei.

Hetichung hian June 12 khan Legislative Council second reading-a pharh tura tih a la ni tho. June 16-ah phei chuan mi 3,38,000 vel zetin duh lohna an lantir tawh. June 15 khan Lam chuan bill chu tihtawp rih a nih thu sawi mah se nawrh hian ziaawm lam a pan thei lo a ni. UK aṭanga thuneihna an neih let champha, July 1-ah phei chuan duh lohna lantir hi mi 5,50,000 an tling tawh niin nawrh huaihawttu lam chuan an sawi.

Duh lohna lantirna hian ziaawm lam a la pan theih loh avangin July 9 khan bill hi a thi tawh tih Carrie Lam hian a sawi leh a, mipuite hnenah thupha a chawi bawk. Hetiang hi ni mah se vawiin thleng hian nawrh hi chhunzawm reng a la ni a, kar 10 chhung zet chu Hong Kong hi a buai tawh a ni. Nawrh huaihawtte hian Hong Kong-in a bik taka zalenna hrang hrang an neih chu a bo an hlauh bakah nawrh huaihawtte chunga police-te tharum thawhna an dem a, Carrie Lam hi bang turin an duh bawk a ni.