Venezuela eptuten Parliament ṭhiah tumah sorkar puh

Venezuela sorkar lam thlawp, Constituent Assembly chuan Thawhṭanni khan ruahman lawk loin session an nei a, hetihlai hian eptu lam chakna National Assembly chuan Parliament ṭhiah tumah sorkar an puh. 

Eptu hruaitu Juan Guaido chuan president Ni­colas Maduro kaih­hruai sorkar chuan inthlan buatsaih hma a, parlia­ment ṭhiah an tum tih a sawi. Hei hi an kalpui a nih chuan, buaina nasa tak a chhuak ngei dawn a ni, a ti. 

Kum 2017-a din, Constituent Assembly hi Madurao-a'n an ram parliament, National Assembly thlakna tura a din nia ngaih a ni. Mahse National Assembly hi ṭhiah a la ni chuang lo a, eptu lam chakna niin, Guaido hi January thla khan assembly president atan thlan a ni. 

Venezuela Parliament inthlan hi kum 2020 a neih chauh tur a ni a, mahse sorkar chuan National Assembly member-te hrem theih loha humhimna pek chu ṭhiahsak tumin hma a la mek a ni, tiin Guaido chuan a sawi. Thawhṭanni khan Supreme Court chuan Constituent Assembly  hnenah legislator pathumte humhimna pek chu hlip turin a lo ngen tawh bawk a ni. Heng mite nen hian eptu member 18-te chu ram phatsan leh helna chawk chhuak zawnga chea puh an ni tawh. Guaido chuan Maduro hian sorkar thlawp lotu legislator-te um bo turin a bei mek tiin a lo sawi tawh bawk.

Nikum inthlanpuiah khan Maduro hi thlan tlin nawn leh a ni a, mahse eptu party tam zawk chuan inthlan hi an boycott a ni. Maduro thlan tlin a nih dan chu an pawm lo tih sawiin, Guaido pawh kumin kumtir khan Venezuela interim president atan a inpuang a, hei hi US leh ram dang eng emaw zatin an thlawp a ni.