Kyrgyzstan president hlui tualthah thubuai siamsak

Kyrgyzstan presi­dent hlui Almazbek Atambayev chu tualthah thubuai leh sorkar paih­thlak tuma puhna thubuai siamsak a ni. 

President hlui hi mipuite fuihpawrh a, lungawi lohna lantirna huaihawt leh mi hrengah puh a ni bawk. Atambayev hi kar kal ta khan police-te chuan a chenna in dapin an man a ni.

Kyrgyzstan ramah hian kum 20 pawh tling loah revolution ṭum hnih a thleng hman a, president hlui leh amah thlaktu Soo­ronbai Jeenbekov-te inkar boruak a ṭha lo hle a ni. General prosecutor chuan Atambayev hi dan kalha ralthuam kawlah puh a ni a, hei bakah hian special force officer thatah te, mi hreng betah leh mipuite sorkar laka lungawi lo tura fuiha puh a ni bawk, a ti. 

August 7 leh 8-a Atambayev in dap a nih khan amah thlawptute chuan security force-te an lo bei let ve a, officer pakhat a thi a, officer dang paruk an hreng zui bawk a ni. He thil thlengah hian mi 80-in hliam an tuar a ni. Kyrgyzstan hi kum 1991-a Soviet Union kehdarh hnua ding a ni a, mihring maktaduai ruk vel chauh an cheng a, a ram mipui tam zawk hi Muslim an ni. Atambayev hi kum 2011-2017 chhung khan president a ni.