Myanmar police-ten pungkhawmte lakah rubber bullet hmang

Myanmar sipaiin sorkar thuneihna a hnehchhuh duh lohna lantirin mipuiten nawrh an huaihawt chhunzawm zel a, nimin khan an ram khawpui Nay Pyi Taw-a pungkhawmte hnawhdarh nan police-te chuan rubber bullet an hmang. 

Punkhawm khap a ni chungin mipui­te chuan lungawi lohna lantirin nawrh an huaihawt chhunzawm reng a, Nay Pi Taw-a pungkhawmte hnawh darh tumin police-te chuan tuiin an phuh a, mahse an kal darh duh loh avangin rubber bullet in an kap zui ta a ni. 

Sipaiin thuneihna an lak hnu leh, sipai hotu Senior General Minh Aung Laing-a'n kawngzawh huaihawtte laka action lak a nih tur thu a puang chungin, mipuite hian sipai chet dan duh lohna leh,  political hruaitu an mante chhuah phutin a zawnin ni li chu lungawi lohna lantirin an pungkhawm tawh a ni. 

New Zealand prime minister Jacinda Ardern chuan nimin khan an ram chuan Myanmar nena high-level-a inbiak pawhna an neih zawng zawng chu an titawp lailawk tih sawiin Myanmar ram sipai hotute chu an rama zin an khap thu a sawi. 

Thuthar thehdarhtute a kawmnaah Jacinda Ardern chuan Myanmar ṭanpuina project an kalpui mekte chu sipai sorkarin a hlawkna an hmu lo tih an finfiah dawn tih a sawi bawk.

"Thuchah khauh tak a sawi duh chu hei hi a ni, New Zealand aṭang hian kan thei ang ang kan ti dawn a, chung zinga pakhat chu Myanmar nena high level-a inbiakna kan neih tihtawp a ni. Chumi bakah chuan Myanmar tana kan luanchhuahna reng reng hi an ram sipaiah a luang lut lo a ni tih tihchian a ni bawk ang," a ti.

Ardern chuan kum 2018 leh 2021 inkarah khan Myanmar ṭanpuina atan hian $ maktaduai 30 an seng tih a sawi bawk.