US carrier group pahnihin South China Sea-ah exercise nei

US carrier group pahnih chuan nimin khan South China Sea-ah exercise an nei. Tunhnai lawk khan US indo lawng chu China thuhnuaia awm thliarkar bul lawkah hmuh a lo ni tawh bawk a, hei vang hian ram pahnih inkar hi a ṭha loh zual hle rin a ni.

Theodore Roosevelt Carrier Strike Group leh Nimitz Carrier Strike Group-te chuan lawng pahnih inkara thu inhrilh tawn dan turte bakah thupek leh lawng thunun theih dante an zir tih US Navy chuan an sawi a, hei hi nikum July thla hnu lamah heng carrier pahnih­te'n a ruala exercise an neih leh hmasak berna a ni.

Chinese Foreign Ministry thupuangtu Wang Wenbin chuan tunhnaia South China Sea-a US indo lawng leh indo thlawhtheihna chet vel dan, an force an pholan velna chuan helai hmun muanawmna leh boruak pangngai taka a awm theihna a tichhe mai mai tih a sawi.

"China chuan a ram himna leh thuneihna a ven­himna atan a ṭul angin hma a la zel dawn a, South China Sea-a boruak muan­awm leh pangngai a awm zel theihna tura a chhehvel ramte chu a thawhpui zel dawn a ni," a ti. 

US president Joe Biden-a'n thuneihna a chan hnua a ṭum khatna atan tunhnai khan USS John S. McCain chu China thuhnuaia awm Paracel thliarkar bulah hmuh a ni a, hei hi China chuan na takin dem mah se US lam chuan 'freedom of navigation operation' a nih thu an sawi ve thung.

Thla hmasa khan US chuan South China Sea chungah hian China indo thlawhtheihna a thlawh thu an sawi ve bawk a, mahse hei hi helai hmuna U.S. Navy aircraft carrier strike group-te tana hnawksak emaw hlauhawm emaw a nih loh thu an sawi a ni.