Germany, Poland leh Sweden-in Russia palai hnawtchhuak

Russia-in kar liamtaa an rama Germany, Poland leh Sweden palaite a hnawhchhuah chhan letnan, heng ram pathumte hian an rama Russia palai awmte chu an hnawtchhuak ve. 

Germany foreign ministry chuan thuchhuah siamin, Russia-in an rama European Union ram palaite a hnawtchhuak chu pawmzam mai theih a ni lo tih sawiin, hei vang hian a chhan letna atan Berlin-a Russian embassy-a thawk chu an hnawtchhuak ve tih Thawhṭanni khan a sawi. Poland leh Sweden pawhin Thawhṭanni vek khan an rama Russia embassy-a thawk chu an ram chhuahsan tura an hriattir thu an sawi. 

Russia chuan ram pathum palaite a hnawhchhuahna chhan chu an eptu hruaitu, jail-a tang mek Alexei Navalny thlawpna lantira nawrh huaihawtnaa an tel ve vang niin a sawi. Ram dang palaite chet dan hi pawm theih a ni lo tih sawiin, international law te awm tura beisei an nih thu an tarlang a ni. Mahse hei hi Germany, Poland leh Sweden ramte chuan an pha thung. Germany chuan an palai hi nawrh huaihawtnaah hian tel loin, thil thlen dan report tura kal mai a nih thu a tarlang. 

Navalny man a nih hnuah hian Russia leh EU inkar boruak hi a chhe chho hle a ni. Kar liam ta khan Moscow court chuan Navalyu hi kum hnih leh thla riat tang turin a hrem. Hetih lai hian EU ramte chuan Navalny hi chhuah turin Russia sorkar an nawr reng a ni.