Colombia-ah kawng zawh huaihawt

Colombia khawpui Bogota-a kar kalta Ningani-a car bomb puaka police 20 an thih avangin Pathianni khan Colombia-a  khawpui hrang hrangah pawikhawihna thleng duh lohna  leh remna leh muanna an duhna lantirin  kawngzawh huaihawt a ni.

Bogota khawpuia kawngzawhnaah hian President Ivan Duque leh president hlui Juan Manuel Santos-te pawh an tel. 

President Duque chuan car bomb tipuaktute chu National Liberation Army (ELN)-te niin a sawi a, left-wing helpawl nena inremna kawng zawna inbiakna an neih pawh chhunzawm a ni tawh dawn lo tih a sawi. 

Hetihlai hian ELN chuan Bogota-a car bomb puak chu an pawl tih a ni lo tih an sawi a, mahse thuneitute chuan car driver chu  ELN explosives expert Jose Aldemar Rojas a nih thu an sawi thung.

Duque chuan Bogota-a kawngzawhte hnenah sorkar leh mipuite chu an rama firfiakte chetna do turin an thawkho zel dawn tih a hrilh a, Colombia ram chu misualte thiltih chuan a tihlau dawn lo tih a sawi. Kawngzawhnaa tel tam tak chuan thawmhnaw var hain, flag var an keng a, tharum thawhna thleng ṭhin an duh loh thute, police leh sipaite beihna thleng an duh lohna thute an aupui a ni.  

ENL hi Colombia rama helpawl lian ber nin, kum 2017 aṭang khan sorkar nen inremna kawng zawngin inbiakna an nei ṭan a ni. Mahse nikum August thla khan President Duque chuan ELN nena inbiakna hi a titawp lailawk a, ELN chu an mi mante chhuah vek phawt tur leh, pawikhawihna an thlen ṭhinte titawp phawt turin a phut a ni.