Macedonia hming vangin Athens-ah buaina chhuak

Greece Prime minister Alexis Tsipras  leh a ṭhenawm ram, Macedonia sorkarin Macedonia ram hming, Republic of North Macedonia tia thlak tura inremna an siam chungchangah lungawi loin, Athens-ah mi tam takin lungawi lohna an lantir. 

Pathianni-a Athens-a kawngzawhte hi police-te nen innawr buaiin, police-te chuan mipui pungkhawmte hnawh darh nan hian tear gas-te an hmang a ni. Greece mipuite chuan Macedonia tih chu Greek a ni a, Macedonia tih hming chu Greece rama province pakhat hming a ni a, ram dangin an hman ṭawm ve an remti lo tih an sawi. An ram leh hnam history-a bet tlat, Macedonia tih chu ram dang hnenah an pek theih loh thu an sawi. 

Republic of North Macedonia hming tia thlakna tur hi Greece Parliament in a la pawmpui ve leh a ngai dawn a, tunkar hian pharh a nih rin a ni. 

Macedonia tih hming chungchanga an buaina hi kum 1991 aṭang inṭan tawh a ni. Yugoslavia ram ṭhendarh a niha an ram chhunga Macedonia bial independent ram a nih khan a hming hi a hmang zui a, hei hi Greece lam chuan nasa takin an sawisel zui nghal a ni. UN-ah chuan he ram hi Former Yugoslav Republic of Macedonia (Fyrom) tia sawi a ni a, mahse an ram hming hi Republic of North Macedonia tia thlak turin inremna an siam ta a ni. He inremna siam hnuaia hian Republic of North Macedonia mipuite chu Macedonians tih an ni ang a, an ram ṭawng pawh Macedonian tih a ni dawn a ni.