Britain-in General Soleimani a sun ve dawn lo : PM Johnson
Britain prime minister Boris Johnson chuan US sipaiten an beihnaa thi, Iran general Qasem Soleimani chu Britain chuan a sun ve dawn lo tih a sawi.
Boris Johnson chuan Pathianni khan US president Donald Trump, France president Emmanuel Macron leh Germany Chancellor Angela Merkel-te pawh a biak thu sawiin, ram hruaitu dang pawh biak leh a la tum tih a sawi. "General Soleimani kha kan tana mi hlauhawm tak a ni a, middle east biala buaina chhuak tam takah pawh a mawhphurtu a ni," a ti. A thiltih avanga civil mi, mi sang telin nunna an chan tawh avangin a thihna chu an sun ve dawn lo tih sawi.
Iran-in nuclear deal zawm tawh dawn lo
Iran president Hassan Rouhani chuan kum 2015-a major power ram parukte nena nuclear deal an lo siama bithliah siam chu an zawm tawh dawn lo tih a sawi. Nuclear deal-ah hian Iran-in uranium a sawngbawl theih zat bithliah siamsak a ni a, mahse he khuahkhirhna hi zawm a tum tawh lo tih a sawi avangin Iran hian atomic bomb siamna lamah hma a lak leh mai a hlauthawm awm hle.
Iran President thusawi avang hian Germany, France leh Britain hruaitute chuan thuchhuah inṭawm siam nghalin, Iran chu nuclear deal an lo siam tawh zawm turin an ngen a, buaina leh tharum thawhna chawkchhuak zawnga che lo tur leh thlawp lo turin an ngen.
Iraq Parliament-in US sipaite chhuahtir tum
General Soleimani thah a nih vanga Iran leh US inkar boruak ṭha lo chuan nghawng a la nei zel a, Pathianni khan Iraq Parliament chuan an rama US sipai awmte chhuah tirna tur resolution a pass.
Iraq-ah hian US sipai 5,000 vel an la awm mek a, anni hian Iran thlawp Hashd al-Shaabi (Popular Mobilisation Forces or PMF)-te nen kum 2014 - 2017 inkar khan Islamic State firfiakte an bei a ni. Mahse Iran thlawptu pawl hrang hrangte'n an phut avangin Iraq sorkar chuan an rama ramdang sipai awmte chhuahtir hi a tum ta nia sawi a ni.
US President Donald Trump chuan Iraq Parliament resolution pass hi chhang let nghalin, US sipaite a chhuahtir tak tak a nih chuan Baghdad chuan a man a tel ngei dawn tih a sawi. Trump chua, "Air base man to takin siam a ni a, a siamna atan hian US dollar tluklehdingawn tel sen a ni. Hemi siamna senso hi min pek let hma chuan kan chhuahsan dawn lo," a ti. Iraq-in ṭawngkam ṭha leh inhriatthiamna tel loa US sipaite a chhuahtir a nih chuan, a hmaa a lo tawn ngai loh anga nain hrek an ni dawn tih sawiin, Iran hrekna siam mek chu a tilang nep vek thei dawn a ni, a ti.