Citizenship Bill in ram leilung fate duhdan a dal lo ang : Assam CM

Assam Chief Minister Sarbanada Sonowal chuan Inrinni khan Citizenship Amendment Bill chungchangah thu dik lo nasa taka thehdarh a nih thu sawiin, pawm a nih pawhin, minority community parukte chuan kum tak chhung an awm hnuah chauh khua leh tui nihna an dil thei dawn tih a sawi.

Sarbanada Sonowal chuan Assam mipuite chu an phatsan dawn loh thu sawiin, an puhna chu dawt mai a nih thu a sawi. Thudik chu bill hi ramdang mi luh theihna tura siam a ni lo, tia sawiin cut off date pawh December 31, 2014 a nih thu a sawi. Hindu, Sikh, Jain, Buddhist, Parsis leh Kristian-te chuan kum sarih tal an awm hnuah chauh khua leh tui nihna an dil thei dawn a ni, a ti.

Sonowal chuan heng diltute pawh hi tualchhung thuneitute leh a buaipuitu district thuneitute chuan an enfiah leh vek dawn tih sawiin, sorkar laipui chu a enfiahtu tur an nih dawn loh thu a sawi. CM Sonowal chuan ram leilung fate venhim chu sorkar tih tur a nih thu a sawi bawk.

CM chuan All Assam Students’ Union (AASU) leh an thurualpuite chu thawhpuia sawmin Assam mipuite duhdan humhim a nihna tur Assam Accord Clause 6 kalpuina tura thawhho a ṭul thu a sawi a ni.

Sonowal chuan sorkar hmasa bei zuiin state bakah sorkar laipuiah pawh an ka chauha thil tiam ṭhinah puhin, a takah engmah an ti ngai lo tih a sawi. Hetihlai hian Prime Minister Narendra kaihhruaina hnuaiah sorkar laipui chuan Assam mipuite duhdan leh an dikna chanvo neihte chu an ngaipawimawh hle tih a sawi bawk.

CM hian Inrinni khan Junbeel Mela a tlawh a, a kalkawngah hian pawl eng emaw zat chuan flag dum an lo zar khum a ni.