Pakistan PM-in PoK a tlawh

Pakistan prime minister Imran Khan chuan an ram Independence Day, nimin khan Pakistan-occupied-Kashmir (PoK) a tlawh. 

August 5-a India sorkarin Jammu and Kashmir special status pekna, Article 370 tih­tawp a nih thu a puan hnuah, Pakistan sorkar chuan na takin India thiltih dan hi a sawisel a, an rama India palai pawh hnawtchhuakin, sumdawnna lama ram pahnih inzawmna pawh a titawp zui bawk. Ram pahnihte inkar boruak hi a la ṭha lo chho hle a ni. 

Khan chuan Independence day chu hun hlimawm, hlim taka awmna hun tur a nih laiin, India nekbehna tawk mek Kashmir mipuite tawrhna chuan a tilungngai hle tih a sawi. Kashmir mite tan chuan an ding zel dawn tih a sawi bawk. 

Pakistan chuan Kashmir mipuite an tawrhpuina lan­tirna atan nimina an ram Inde­pendence Day hi a hran­paa lawmna siam loin, Kashmir mite an thlawpna leh tawrhpuina lantirna ni atan an hmang. Pakistan President Afirf Alvi chuan Islamabad-ah flag pawtpharhin, Kashmir laka India chetdan chu international law palzutna a ni, a ti. Pakistan chuan Kashmir mipuite chu a thlahthlam ngai dawn lo a, an natna tawrh chuan anni pawh a ti na a, an theih tawpin an tan an bei zel dawn tih a sawi.