Hong Kong-ah thlawhtheihna thlawhtir leh tawh

Hong Kong-a nawrh huaihawtna nasa tak thleng avanga flight eng emaw zat cancel a nih hnuah, nimin aṭang kha chuan venhimna khauh tak hnuaiah thlawhtheihnate pawh a pangngaia thlawh tir leh an ni tawh.

Thawhṭanni leh Thawhlehni khan flight hi cancel a ni a, Thawhṭanniah phei kha chuan flight zawng zawng cancel a ni. Thawhlehni pawh khan flight 100 chuang zet chu cancel a la ni bawk. Hong Kong airport-ah hian nawrh huaihawttu mi tam tak chuan duh lohna lantirin, thuziakte kengin ni ruk zet chu an ṭhu tawh a ni. Mahse nimin zing lamah chuan thlawhtheihna hi dan pangngai anga thlawhtir leh ṭan an ni tawh a, mahse flight ṭhenkhat chu an la cancel tho a ni.

Airport thuneitute chuan aiport chhunga nawrh huaihawt hi an khap tih sawiin thuchhuah an siam a; venhimna tikhauh zualin staff leh passenger-te chauh terminal chhunga luh an phal. Hong Kong-ah hian kar 10 chhung zet chu duh lohna lantir a ni tawh a, ziaawm lam a pan thei lo a ni.