Vanglaini logo

India-in PoK beih a tum, a tawp thlengin Kan bei let ang: Pakistan PM

Pakistan prime minister Imran Khan chuan Pakistan-occupied Kashmir (PoK) assembly special session-a thu a sawiah, India chuan PoK beih a tum a, mahse Pakistan chuan a tawp thlengin a beih leh tur thu a sawi.

Imran Khan hian Pakistan Independence Day, August 14 khan PoK hi a tlawh a, Muza­ffarabad-ah assembly special session an nei nghal. Rashtriya Swayamsevak Sangh (RSS) thuthlung pawh sawiselin, Nazi ang maia hlauhawm a nih thu te, Jammu and Kashmir special status pekna, Article 370 tihtawp pawh RSS te duhdan anga tih a nih thute a sawi. BJP chuan India a tichhe mek a, India mipuite chu thlabar takin an awm mek a, hei hi Nazi Germany hun laia thil thleng ang kha a ni, a ti. 

Pakistan rorelna hnuaia awm, Azad Jammu and Kashmir (J&K) chu India-in beih tumina ruahmanna a siam tih Pakistan army-te chuan a hria a ni, tiin Imran Khan chuan a sawi. "India hian dan kalha thil a ti a nih chuan a tawp thlengin kan bei let dawn a ni. Na takin kan chhang dawn a, ram pum mipuite pawhin Pakistan Army chu an thlawp tlat ang. Muslim-te hi Allah ni lo midang hmaah kan tlawm ngai lo. Modi hian AJ&K hi a bei a nih chuan zirtirna kan pe ang," a ti.

Legislator-te hmaa thu a sawiah Khan chuan, "Modi hian ngaihtuahna tawi takin a hmang a ni. Amah leh a kaihhruai BJP sorkarin a tawrh phah nasa ngei ang. Thil chhut dik tawk loh lian tak a nei a, a card hnuhnung ber a khel mek a ni," tiin a sawi. 
Indona thleng tur dang tura international organisation dingte chu thu chahin, Khan chuan India leh Pakistan inkara indona a thleng a nih chuan mawhphurtuah heng pawlte hi a puh dawn tih a sawi bawk. 

Indian jet kapthlatu pilot pahnih chawimawi dawn
Pakistan chuan kumin February thlaa India nena an inbeih ṭuma Indian Air Force fighter jet kapthlatu, pilot pahnih Wing Com­mander Muhammad Nouman Ali leh Squad­ron Leader Hassan Mah­mood Siddqui-te chu chawimawina a hlan dawn. 

Indian Air Force pilot Abhinandan Varthaman khalh, IAF fighter jet kapthlatu Wing Commander chu Laihi Sitar-e-Jurat hlan a ni dawn a, Squadron Leader Siddiqui hi Tamgha-e-Shujat hlan a ni thung ang. He chawimawina hi nakkum March 23, Pakistan Day lawmna neih hunah hlan an ni dawn tih Pakistan Army thuchhuah chuan a tarlang.