Philadelphia-ah inkahna thleng
US-a Philadelphia khaw hmarlamah Nilaini khan police-te'n ruihtheih thil man tuma in an dap laiin pawn lam aṭangin mi pakhatin a kap a, police officer parukin hliam an tuar.
Inkahna hi tlailam dar 4.30 bawr vela thleng a ni a, police officer-te hian ruihtheih thil man tuma inchhung an luhchilh laiin pawn lam aṭangin a lo kap a ni. Silai kaptu hian hmun hrang hrang a kap kual a, police-te hian an kap let ve bawk. Ṭhenawm khawvengte pawh an in a tawm him turin leh hmun hima awm turin police-te chuan hriattir nghal bawk.
"Silai hmetpuaktu hian police officer paruk a kap hliam a, mahse nunna chan hlauhthawnawm an awm lo. Damdawi-ina enkawl zui an ni," tiin police sergeant Eric Gripp chuan a sawi. He thil thlenga inhnamhnawiha puh, kum 36 mi Maurice Hill chu Philadelphia khaw mi tho niin, silai kah chungchanga thubuai nei tawh a nih thu a lawyer hlui Shaka Johnson chuan The Washington Post a hrilh. Maurice Hill hi thu zawhfiah turin police-ten an kawl mek.