DR Congo court-in inthlan result pawm

Democratic Republic of Congo, DR Congo president thlanna neih taka eptu candidate Felix Tshisekedi chaka puan chu constitutional court chuan pawmpuiin, a nemghet. 

Election commission-in Decem-ber 30-a president thlanna result a tihchhua-ah eptu candidate Felix Tshisekedi chu chakah puan a ni a, mahse hei hi eptu candidate dang leh inthlana pahnihna Matin Fayulu chuan an pawm lo a, constitutional court-ah result chhiar ṭha tura ngenna a thlen a ni. Fayuly chuan ram dangte pawh official election result hi pawm lo turin an ngen bawk. 

African Union (AU) pawhin DR Congo president thlanna result tihchhuah chu a rinhlehlawm nia a ngaih thu a sawi tawh bawk a ni. 

Mahse constitutional court chuan Fayulu hian election commission-in inthlan result a tihchhuah hi a dik tawk lo tih finfiahna a nei lo nia sawiin, a appeal-na hi a hnawlsak a, Felix Tshisekedi chu DR Congo president atana simple majority hmanga a tlin thu a puang nghal bawk. 

Court-in inthlan result tihchhuah a pawmpui thu a sawi tak avang hian Tshisekedi hi ni 10 chhungin president thar atan lakluh a nih beisei a ni. 

Sorkar thupuangtu Lamber Mende chuan court thutlukna siam chu lawmawm a tih thu sawiin, Tshisekedi chu an ram president panga-na atan lakluh a ni thuai dawn tih a sawi. Tshisekedi thupuangtu Vidiya Tshimanga pawhin court-in Congo mipuite duhthlanna thlawp zawnga thutlukna a siam chu lawmawm an tih thu a sawi a, president thar hnenah hian thuneihna hlan a ni thuai dawn tih a sawi.