Mexico-ah Gas pipeline puakah mi 73 thi

Mexico rama Hidalgo state-a kar kalta Zir-tawpnia gas pipeline puak avanga thi chu mi 73 an tling tawh a, midang 74 in hliam an tuar. 

Gas pipeline hi gas ruk tum ten an verh pawp a, gas putchhuak la tura mi tam tak an punkhawm laiin kar kalta Zirtawpni zan dar 7 vel khan a puak ta a ni. He pipeline hi sorkar company, Pemex enkawl niin Gulf of Mexico aṭanga Tula refinery inkarah siam a ni. 

Mexico ramah hian tuialhthei ruk tumten pipeline an verh avangin vanduaina a lo thleng fo tawh a ni. 

Kar kalta Inrinni khan Mexico President Lopez Obrador chuan vanduaina thlenna hmun hi a tlawh a, he chhiatna thleng hian tuialhthei ruk tuma misualte chetna thleng ṭhin dang tura nasa zawka beih a ngaihzia a tilang tih a sawi. Hetianga thil thleng ṭhin hi a tihtawp ngei tur thu a sawi bawk. Gas pipelien aṭanga tuialhthei ruk ṭhin chuan an ram sum dinhmun thlenga a nghawng bakah, mi tam tak thihna pawh a lo thlen tawh a ni, tih a sawi bawk. 

Zirtawpni zana gas pipeline puak vanga kangmei chhuak hi darkar li vel hnuah an ṭhelh mit thei chauh a, hun rei tak hnua pipeline chhiatna thlenga rapthlak ber a ni. Kum 2010 khan Puebla state-a pipeline puakah mi 27 an lo thi tawh a, hei pawh hi tuialhthei ruk tumte thiltih vang bawka thleng a ni.