President Trump-a'n rawtna dang siam

US President Donald Trump chuan US-Mexico ramri hungna bang siamna tura Congress hnena US dollar tluklehdingawn 5.7 a dil chu pek a nih theihna turin rawtna dang a siam a, sum hi pek a nih chuan an rama pem lutte venhimna ṭha zawk siamsak a tiam. 

Mahse Democrats lam chuan President Trump rawtna hi an pawm lo. 

Ramri hungna bang siamna tur chungchangah Trump-a kaihhruai Republican Party leh House Speaker Nancy Pelosi kaihhruai Democratic Party te an inrem theih loh avangin hun rei tak chhung US sorkar chu hnathawk mumal thei loa khar, shutdown a ni tawh. Inrinni thleng khan sorkar hi ni 29 chhung shutdown a ni tawh a, US chanchina shutdown a nih rei ber ṭum a ni. Sorkar department ṭhenkhatte hna thawk mumal thei loa an awm avangin sorkar hnathawk nuai 8 chuang chuan hlawh an la thei tawh lo a ni. 

Trump chuan hun rei tak sorkar phuarbeh a ni chu titawp tura hma an lak a ngai tih a sawi a, Congress tan shutdown tihtawpna tur leh, ramri chungchang buaina chinfelna tur kawng a kawhhmuh thu a sawi. Ramri hungna bang siam a tum chungchangah a ngaihdan a la ngai reng tih sawiin, ramri venhimna chu thil pawimawh a ni a, an ram tihchhiat duhtuten ramri chu an thunun tur a ni lo, a ti. 

President-in rawtna a siamah hian naupang an nih laiah US-a dan loa hruai luh, 'Dreamers' tihte humhalhna pek a tiam a, hei bakah hian leilung chhiatna thleng leh tharum thawhna thleng vanga US-a tlanchhiate hnenah temporary protected status pek a tiam bawk.  Dreamers te humhalhna siambelh sak a tiamah hian work permit leh social security number pek an nih dawn bakah, US aṭanga thawn haw an nih tur lakah venhimna pek an ni dawn bawk a ni.