EU Parliament-in Brexit deal pawm UK-in EU chhuahsan dawn ta

European Parliament chuan EU aṭanga United Kingdom (UK) inlak­chhuah­na tur inremna an siam, withdrawal agree­ment chu a pawmpui ve leh ta. Hei vang hian an lo ruahman lawk angin vawiin hian Britain chuan EU a chhuahsan dawn ta a ni. 

Nilainia EU Parliament-a vote laknaah, Britain Parliament-in a lo pawm tawh,  Brexit deal thlawp lamah member 621 in an vote a, mi 49 in an thlawp lo thung. Kum li zet an buaipui hnuah, London huna zanin dar 11 hian UK chu EU aṭangin a inlachhuak fel thei dawn ta a ni. 

EU Parliament-a UK inlakchhuahna tur pawm a nih hnu hian member ṭhenkhat chu an lung a chhe hial. Vote lak hnu hian member-te chuan Scottish inthlahna hla, 'Auld Lang Syne' an sa zui a ni.  EU Commission president Ursula von der Leyen chuan UK chu an ngai reng dawn a, an inmihran dawn chuang lo tih a sawi. Parliament chief Brexit official, Guy Verhofstadt chuan an vote lak chu inmang-

ṭha hlenna tur ni loin, inhmu leh tura inthlahna mai a ni tih a sawi bawk. 

UK hian EU chhuahsan mah se kumin kumtawp thleng chuan EU economic arrangement hnuaiah a la awm dawn a, mahse member a nih ve tawh dawn loh avangin policy chungchangah erawh sawi theih a nei tawh lo ang.