Sudan PM atan Abdalla Hamdok an rawt

Sudan rama nawrh huaihawttu pawl chuan an ram prime minister atan UN official hlui Abdalla Hamdok chu an nominate thu an sawi.  

Alliance for Freedom and Change (AFC) hruai­tute pawhin PM atana Hamdok nominate a nih hi an thlawp bawk. Nawrh huaihawt hruaitute leh military council-te chuan July 17 khan thuneihna insem dan tur an lo sawi tawh a, vawinah inremna thu an ziak ang. Hei hi an rama mipui sorkar a awm theihna tura thil pawimawh tak a ni.

Sudan-ah hian Sudanese Professionals Association (SPA) kaih­hruaina hnuaiah nikum December thla aṭang khan fuel leh eitur man san avangin nawrh huaihawt ṭan a ni a, khatih hun laia ram hruaitu president Omar al-Bashir duh lohna an lantir a ni. Mahse kumin April 11 khan sipai chakna hmangin Transitional Military Council (TMC)-te chuan President hi an paihthla a, sipai sorkar an siam zui a ni. 

SPA hian mipui sorkar din an duh avangin nawrh hi an huaihawt a, June thla khan nawrh huaihawtte leh sipaite inkara buaina chhuakah mi 113 lai an thi. Sudan President hlui Bashir hian nikum khan Hamdok hi finance minister tur atan a nomi­nate a, a cabinet siamṭhat a nih hnuah hnawl a ni. Hamdok hian kum 2011-2018 October thleng khan UN Economic Commission for Africa-ah deputy executive secretary hna a chelh.