Indonesia President-in an ram khawpui sawn rawt

Indonesia President Joko Widodo chuan Par­liament-ah an ram khaw­pui, Jakarta chu Borneo thliarkara sawn a rawt. 

President Widodo chuan nimina parlia­ment-a state of the union speech a neihnaah he rawt­na hi a sawi chhuak a, an ram khawpui sawn a nih theihna turin Parlia­ment remtihna a dil tih a sawi. 

Widodo chuan, "Ram khawpui hi a ram nihna lantirna chauh a ni lo a, ramin hma a sawn dan lantirtu pawh a ni tel a ni," tiin, khawpui sawn a rawtna chu economy lama intluktlanna tur atana ti  a nih thu pawh a sawi. Khawpui thar sawnna tura a tih tak erawh a sawilang lo thung a, Borneo thliakara province pathum- Central Kalimantan, East Kalimantan leh South Kalimantan-te chu khawpui sawnna tur hmun remchang a nih thu a sawi.  

Jakarta khawpui hi a tawt tawh hle a, metro­politan area-a cheng pawh mi maktaduai 30 vel an tling. April thla khan Planning Minister Bambang Brodjonegoro chuan khawpui thar siamna tur chuan ram hectare 30,000 - 40,000 vel mamawh a ni dawn tih sawiin, he hmunah hian mi nuai 9 - maktaduai 1.5 vel an cheng thei dawn tih a sawi. Mahse awlsam taka tihfel mai theih a ni dawn lo a, kum 10 vel a ngai dawn a ni, a ti. Khawpui sawnna tur hian dollar tluklehdingawn 32.5 vel zet a ngai dawn tih a sawi bawk. 

Widodo hi April thlaa inthlanpuiah khan thlan tlin leh a ni a, October thla a president term hnih­na atan lakluh a ni ang.