US-in Canada leh Mexico free trade agreement ziahpui

US president Donald Trump chuan Nilaini khan hun rei tak an lo buaipui tawh North American Free Trade Agreement (NAFTA) thlakna tur, United States–Mexico–Canada Agreement (USMCA) chu a hming a ziah hnan a, law-ah a chantir ta.

Washington DC-a White House kawtah USMCA ziah­felna hun hi hman a ni a, he hun hi US House of Re­presentatives Speaker Nancy Pelosi chuan a kaihruai. President Trump chuan ram pathumte insumdawn tawnna tura thawhhona thar a ziah avang hian a lawm thu sawiin, US Industry-in nasa taka hma a sawn phah dawn thu kalkhawmte hmaah a sawi. 

USMCA dan thar hnuai­ah hian a bikin auto manu­facturing lamah US mi leh sain hna tam tak an hmuh belh theih dawn a, Mexican auto worker tan hlawh pawh a san chhoh phah dawn bawk a ni. E-commerce, intellectual property leh investment lamah pawh nghawng a nei bawk dawn a ni. 

Nikum December 10 khan Mexico lam hian USMCA hi an thlawp leh an pawmna an tichiang tawh a, he inremna hnuaiah hian Mexico pawisa hlutna pawh a san phah rin a ni bawk. Canada ram erawh chuan kar leh chho hian he inremna chungchang hi an pawm fel ve theih chauh rin a ni thung.

Kum 1994 January 1-a ram pathum te'n an hman ṭan NAFTA hi Trump chuan duh loin a lo sawisel fo tawh a, NAFTA vang hian US-a factory te chu an hlawk loh phah thu leh, US manufacturing job-a auto industry lamah hna a tlem phah niin a sawi. Inremna siamṭhat a nih loh chuan inhnuhdawhah a lo vau tawh bawk a ni.