China in a sipai zat titlem

Khawvela sipai ngah ber ram ni mek, China chuan a sipai zat chu 50% dawnin a titlem nin China official news agency Xinhua chuan a tarlang. 

Nikum khan People's Liberation Army (PLA) a sipai maktaduai 2.3 awm chu 300,000-a tihtlem a ni a, non-combat institution-a active duty member chu a zahve dawna tihtlem niin, officer zat pawh 30% in tihtlem a ni bawk. A sipai zat hi nasa takin titlem mah se, China hi khawvela sipai ngah ber ram a la ni reng tho a ni. 

Chinese media chuan PLA official-ten an ram sipai zat hi maktaduai khat chinah tihhniam an duh niin nikum khan an lo tarlang tawh a ni. Hei hi President Xi Jinping-an an ram sipaite hmanrua changkang zawka thuamna tura ruahmanna a siam, Navy leh Air Force tana sum tam zawk hman a nih theihna tura a ruahmanna peng pakhat nia sawi a ni. 

China Central Military Commission hotu, President Xi hian PLA-a eirukna awm ṭhin chu tihbo tumin hma a la a, sipai 3,000 zet hrem leh ban an ni tawh a, an zingah hian sipai hotu pawh eng emaw zat an tel. PLA hi rorellai, Communist Party thununna hnuaia awm a ni. 

Kum 1927-a din, PLA-ah hian ground force, Navy, Air Force, artillerry bakah armed police an awm a ni. Army hi service branch panga - Ground Gorce, Navy, Air Force, Rocket Force leh Strategic Support Force-ah ṭhen leh an ni bawk. 

Kum 1980 kha PLA sipai hi maktaduai 4.5 zet an tling hman a, hei hi kum 1985 khan maktaduai thum-ah tihhniam a ni a, a hnuah maktaduai 2.3-ah tihhniam a ni leh a ni.