US Supreme Court-in Trump-a khapna thupek remtihsak

United States Supreme Court chuan President Donald Trump-an nihna thlakthleng (transgender)-te an ram sipaia an luh khapna policy a siam chu hman a remtihsak. 

President Trump hian kum 2017 khan sipaiah transgender-te chu an luh phalsak a ni dawn lo tih a sawi a, a chhan chu heng mite hi damdawi lama inenkawlna a hautak bakah an sipai puite nena an inkar boruak pawh a tichhe thei niin a sawi a ni. Mahse he khapna siam an tum hian sipaia transgender lo awm sate erawh a huam dawn lo niin hetihlaia defence secretary Jim Mattis chuan a sawi. 

Department of Defence data-a a landanin America sipai zingah hian transgender 8,980 an awm mek a ni.  

Trump-an transgender-te sipai luh khapna a siam hian sawisel a hlawh hle a, court hniam zawkte chuan he khapna hi hman theih loh turin an dansak a, mahse Trump-a kaihhruai sorkar chuan Supreme Court-ah a appeal a ni. Supreme Court chuan Thawhlehni khan ngaihtuahin, policy hman khapna hlip tura an ngenna thlawp lamah judge panga-in an vote a, hetihlai hian liberal  judge pali-te erawh chuan a thlawp lo lamah an vote thung.