UK-ah quarantine dan zawm lote Kum 10 thleng tantir theih

Britain sorkarin an rama Covid-19 hri leh a hri chi thar hmuhchhuah te darh zel tur venna atana an rama khualzin lutte tana inkhunghranna dan thar a siam zawm lo chu British pound 10,000 thleng chawitir theih an nih bakah,kum 10 thleng lung in tantir theih an ni bawk ang. 

Department of Health and Social Care chuan dan thar khauh zawk an siam hi February 15 aṭanga hman ṭan tur a ni tih sawiin, he dan hian hotel-a inkhunghrangte pawh a huam vek dawn a ni. Health and Social Care Secretary Matt Hancock chuan an rama hripui leng mek a reh theihna tura theihtawp an chhuahnaah dan khauh zawk siam thar hi thil ṭul tak  niin a sawi. 

February 15 aṭangin khawi ram aṭanga pawha England rama lutte chu ni 10 chhung inkhung hrang phawt tura tih an ni dawn a, an inkhung hran aṭanga ni hnihna leh a ni riatnaah coronavirus test an tih a ngai bawk ang. He dan thar hi England an pan hma ni thuma coronavirus test-ah negative an ni tih finfiahna nei vek tura phutna pawh a la huam tel vek a ni. 

Khualzin lutte chu an inkhunghrangna tur leh test an tihna tur 'quarantine package' siam chu lei vek tura tih an ni bawk. Sorkar chuan hotel-a inkhunghranna tur atan hian damdawi-in 16 chu contract a ziahpui tawh a, room 4,600 a awm. Sorkarin hri leng la hluarna rama a chhal, 'red list' ram aṭanga lutte chu hotel-ah hian an inkhunghran a ngai a, mahse red list-a tel lo ram aṭanga lutte erawh chu hotel kher loah pawh ni 10 chhung an inkhunghran phalsak an ni thung. 

Britain sorkar chuan a tirah red-list ramah hian ram 33 a dah a, mahse ram ṭhenkhatte chu paih tawhin tunah hian 22 a la dah mek.