Senate-in Donald Trump impeachment kalpui remti
US Senate chuan President hlui Donald Trump-a impeachment trial chu ram danpui kalh a ni lo tiin, kaltlangpui a remti.
Donald Trump-a defence team chuan Trump hi President ṭanglai a ni tawh loh avangin impeachment trial hi a hmachhawn a ṭul tawh lo a, hei hi an ram danpui pawhin a huam lo niin an sawi. Mahse kaltlangpui a nih dawn leh dawn loh chungchanga Thawhlehnia Senate-a vote laknaah, kaltlangpui duh lamah vote 56 tlain, a duh lo lamah vote 44 a tla thung. Vote laknaah hian Republican member parukin impeachment trial kalpui duh lamah Democrats an vote pui a ni.
Republican member ṭhenkhat vote puihna avangin Senate hian Trump impeachment trial kalpuina turin thutlukna siam ni mah se, a chungthu ngaihtuah hunah Trump hi thiam loh chantir tur chuan seat 100 awmna, Senate member hmun thuma ṭhena hmun hnihin an thlawp a ngai dawn a, hei vang hian thiam loh chantir hi a har rin a ni thung. Thiam loh chantir a nih chuan Trump hi politics khelh chhunzawm thei lo tura phuar theih a ni ang.