Khawthlang ramten Myanmar police-te chet dan dem

Myanmar sipaiten February 1-a mipui sorkar thuneihna an hnehchhuh sak avanga lungawi lohna lantira nawrh huaihawtte laka Myanmar police-te chet dan chu United States leh United Nations chuan an dem thu an sawi. 

Thawhlehni khan Myanmar khaw­pui, Nay Pyi Taw-a nawrh huaihawtte chu police-te chuan tuia an phuh bakah rubber bullet-in an kap a ni. Hei vang hian pungkhawm zinga ṭhenkhat chuan hliam an tuar phah a ni. Sipaiten pungkhawm khapna thupek tichhuak mah se, nimin khan a zawnin a ni ngana atan mipuite chuan khawpui hrang hrangah sipai chet dan duh lohna lantirna leh, political leader an mante chhuah phutin lungawi lohna an lantir chhunzawm zel. Sipaite chet dan duh lohna lantira civil disobedience campaign neih chu sorkar hnathawk ṭhahnem takin an thlawp tawh bawk. 

Nawrh huaihawt mekte hian civil sorkar kuta thuneihna pek let leh, hruaitu mante chhuah tura an phut bakah, kum 2008-a sipai sorkar laia ram danpui siam chu ṭhiah an phut bawk. He danpui siam hnuaiah hian sipai hotute chu Parliament-ah thuneihna sang tak pek an la ni a, ministry pawimawhte chu sipai chanpuala dah a la ni bawk a ni. 

United Nations chuan Myanmar security force-te chu mipuite rights zahsak turin a ngen a, boruak ṭha tak hnuaia nawrh huaihawtte laka tharum leh tihluihna hman chu pawmzam theih a ni lo tih Myanmar-a UN representative Ola Almgren chuan a sawi.