Israel PM-in Hamas-te beihletah vau

Israel Prime Minister Benjamin Netanyahu chuan Palestinian Islamist group, Hamas-te chu Gaza ramri bula tharum thawhna an thlen thar leh chuan na taka chhan letah a vau. 

Gaza Strip ramri-a Palestinian-te nawrh huaihawt a, Israel sipaite nena an innawr buai ṭhin chu hun eng emaw chen boruak a ṭhat hnuah Thawhlehni khan buaina a chhuak thar leh a, ramri-a duty Israel sipai pahnihte kah niin pakhat zawkin hliam na vak lo a tuar a ni. Sipaite beih an nih vang hian Isarel chuan tank hmangin Gaza-a Hamas-te hmun pahnih chu a kap let nghal a, firfiak pakhat an thi a, zanah indo thlawhtheihna hmangin Gaza hmarlama Hamas military camp a bei zui bawk. 

PM Netanyahu chuan Gaza chhawmdawlna tura Qatar-in dollar maktaduai 15 a pek pawh a dansak a, Israel sipaite beitute chu na takin a chhanglet zel dawn tih sipaite pawh a hrilh  nghal bawk a ni. Israel chhim lama military exercise neihnaah he thu hi Netanyahu chuan a sawichhuak a ni. 

Israel leh Hamas-te hi kum 2008 aṭang khan ṭum thum an indo tawh a, indo ṭum lina hi a thlen mai hlauhthawnawmin a awm fo a ni. Nikum November thla khan inremna siam mah se hemi hnu hian tharum thawhna hi a la thlen chhunzawm reng a ni. Inremna an siamah hian Israel chuan Hamas ṭhianṭha, Qatar ramin Gaza-a chengte tana chhawmdawlna a pek a phalsak a, heng zingah hian Hamas sorkar hnuaia thawkte hlawh tur thla khata dollar maktaduai 15 pek tur pawh a tel a ni. January thla atana Qatar pawisa pek tur hi Nilaini khan Gaza a thlen beisei a ni a, mahse Israel sipaite beih an nih avangin PM Netanyahu chuan a dansak rih a ni.