US Senate-in shutdown tihtawpna tur bill hnawl
US Senate chuan sorkar shutdown tihtawp a nih theihna tur bill pahnih chu a hnawl a, hei vang hian sorkar chu shutdown chhunzawm a la ngai dawn.
Ningani khan Senate chuan bill hi a ngaihtuah a, Republican bill chu thlawptu 50 awmin a thlawp lo lamah vote 47 a tla a, Demcoratic bill chu a thlawp lamah vote 52 tlain, thlawp lo lamah vote 44 a tla bawk. Heng bill pahnihte hian tlang turin vote 60 an hmuh tlin a ngai a ni.
US sorkar shutdown hi an ram chanchina a rei ber ṭum niin, Zirtawpni kha a ni 34 na a ni tawh. Hun rei tak hnathawk mumal thei loa sorkar department eng emaw zat an awm tawh avangin sorkar hnathawk 80,000 zet chuan hlawh an la thei lo a ni.
Senate-a bill hnawl a nih hnuah hian party pahnih hruaitute chuan sorkar agency hrang hrangte hawn an nih theih dan tur rawtna tharte an sawiho nghal.
Hetihlai hian President Donald Trump chu a dinna ngaiah a la ding reng a, ramri hungna bang siamna tur telhna bill chauh a sign dawn tih a la sawi chhunzawm reng a ni.
Vote lak hmaa Associated Press-in mipui ngaihdan a lak report a tihchhuahah, sorkar shutdown hian President Trump-a larna a tihhniam phah hle niin an tarlang. Thla hmasa khan Trump-a thlawptu 42% an awm laiin, opinion poll thar berah hian 34%-ah an tlahniam a ni. Hetihlai hian Republican voter zingah erawh Trump-a thlawptu hi 80% dawn an tling thung.
Shutdown tawp hnuah State of the Union speech nei dawn
President Trump chuan karleha neih tur, State of the Union speech chu sorkar shutdown tihtawp a nih hnuah neih a remti. Speaker Nancy Pelosi chuan House of Representatives chamber-a thu sawi tura President Trump a sawmna pawh a sut leh a ni.
State of the Union speech hi January 29-a neih tura ruahman lawk a ni a, kumtin President-te hian Congress chamber pahnih hmaah thu an sawi ṭhin. President Trump chuan Nancy Pelosi hian sorkar shutdown ni mah se State of the Union speech hi nei turin a sawm a, heihi a remtih hnuah Pelosy chuan rilru thlak lehin a hun hi a sawn hla leh niin a sawi. Hei vang hian shutdown tawp hunah thu hi a sawi zawk dawn tih a sawi a, hei hi a neih theih thuai a beisei thu a sawi bawk.