Venezuela-in US-a embassy a khar

Venezuela President Nicolas Maduro chuan US-in an ram president lailawk atana eptu hruaitu, Juan Guaido a pawm thu a sawi vangin US-a Venezuela embassy chu khar turin Ningani khan thupek a tichhuak. 

Venezuala eptu pawl hruaitu Juan Guaido chuan Nilaini khan Venezuela interim president-ah a inpuang a, hei hi US chuan a thlawp a, ram dang eng emaw zatin Guaido hi Venezuela ram hruaitu atan an pawm nghal bawk. 

US-in Guaido a thlawp thu a puan hnuah, President Maduro chuan an rama US palai awmte chu darkar 72 chhungin an ram chhuahsan turin thu a pe a, hemi hnu hian US-a an embassy leh consulate pawh khar a nih tur thu leh, an ram palai pawh US chhuahsan turin a hriattir nghal a ni. Maduro chuan US nena inpalai tawnna leh inzawmna chu a tichat vek dawn tih a sawi. 

US chuan Venezuela-a US sorkar hnuaia thawk, non-emergency staff-te chu hruai haw vek an ni dawn tih a sawi. Maduro chuan US nena inpalai tawnna leh inzawmna chu a tichat vek dawn tih a sawi. 

Guaido chuan Maduro-a thutlukna siam hi an pawmpui ve lo tih sawiin, Maduro chu hruaitu atana pawm a nih tawh loh avangin a thupekte chu zawm a ni dawn lo tih a sawi thung. 

Hetihlai hian Venezuela sipai hotu Vladimir Padrino Lopez chuan Maduro chu an thlawp tih sawiin, an ram inrelbawlnaah US chu inrawlh lo turin a vau. TV-a thu a sawiah defence minister Lopez chuan Maduro chu an ram ram hruaitu atana dan ang taka thlan tlin a ni tih sawiin, eptute chuan mipui thlan sorkar chu tharum hmanga paihthlak tumin an bei a ni, a ti.