Philippines-a biak-in beihnaah mi 27 thi

Philippines chhim lam, Jojo island-a Roman Catholic cathedral-ah nimin khan bomb pahnih a puak a, mi 27 an thi a, midang 77 velin  hliam an tuar. 

Bomb hmasa zawk hi an ram huna zing dar 8.45, Jojo island-a Our Lady of Mount Carmel cathe­dral-a mass neih laiin a puak a, bomb puahna hmuna sipaite leh chhanchhuah hna thawktute an punkhawm laiin a pahnihna hi tihpuah zui leh nghal a ni. Thi zingah hian sipai eng emaw zat an tel. Tunhma pawhin he cathedral-ah hian bomb tihpuah a lo ni tawh a ni. 

Jojo island hi Abu Sayyaf firfiak pawl hluarna a ni a, hel pawl eng emaw zat an awm bawk. Mahse nimina biak-ina bomb puak hi eng pawl mahin an tih niin an la chhal lo. 

Bomb puahna hmunah hian sipaite tirh nghal niin, hliam tuarte chu thlawhtheihna hmangin Zamboanga-ah hruai nghal an ni. 

Defence Secretary Delfin Loren­zana chuan pawikhawihna thleng chu a dem thu sawiin, firfiakte do letna kawngah thuneitute thawhpui turin tualchhung mite a ngen nghal bawk. Pawikhawihtute chu dan ang taka an chunga ro rel sak an nih theihna turin theihtawp an chhuah dawn tih a sawi.