Venezuela President inthlan buatsaih turin ti

Europe ram hruaitute chuan tualchhung politics buaina tawk mek, Venezuela Preisdent Nicolas Maduro chu ni riat chhunga inthlanpui buatsaih turin Inrinni khan an hriattir a, hei hi a ti lo a nih chuan eptu hruaitu chu Venezuela ram hruaitu atan official-a an pawm tur thu an sawi.

Kar kalta Nilaini khan eptu hruaitu, National Assembly-a hotu Juan Guaido chuan Vene­zuela acting president-ah a inpuang a, hei hi US bakah khaw­thlang ram eng emaw zatin an pawmpui nghal a ni.

Mahse Venezuela Foreign Minister Jorge Arreaza chuan New York-a UN Security Coun­cil-ah hei hi pawm a nih loh thu sawiin, Maduro chu dan ang taka an ram president atana thlan tlin a ni tih a sawi. Inthlan buatsaih turin ramdangte chuan an ram chu an nawr thei lo ang tih a sawi bawk. 

Arreaza chuan Guaido chu tharum hmanga an ram sorkar paihthlak tumah a puh a ni. 

Inrinni khan UN Security Council member-te chuan Vene­zuela ram dinhmun hi an sawiho a, EU aiawha thusawitu, UK Foreign Office Minister Sir Alan Duncan chuan Venezuela-ah chuan an ram mipuite duhthlan leh aiawhtu sorkar a din a ngai tih a sawi a, hei vang hian inthlanna felfai leh langtlang buatsaih thuai tura an phut thu a sawi. 

Hetihlai hian UNSC member Russia chuan ramdangten Guaido an thlawp thu an sawi chu international law palzutna a ni tih sawiin, hei hi thisen chhuahna tur kawng hawngtu a ni, a ti. China, Mexico leh Turkey pawhin President Maduro an thlawp thu an sawi bawk. 

Nicolas Maduro hi nikuma inthlan an neihah president term hnihna chelh tur hian thlan a ni a, mahse he inthlan buatsaih dan hian sawisel a hlawh hle a, eptu candidate tam tak chu inthlana chuh phalsak an ni lo a, tam tak jail-ah tantir an ni bawk.