Maduro-an inthlan buatsaih tura hriattirna hnawl

Venezuela President Nicolas Maduro chuan kar kalta Inrinni-a Europe ram hruaituten ni riat chhunga an ram inthlanpui buatsaih tura an hriattirna chu a hnawl. 

Venezeula ram hian tual-chhung politics buaina nasa tak a hmachhawn mek a, eptu pawl hruaitu leh National Assembly-a hotu Juan Guaido chu an ram acting president-ah a lo inpuang tawh a, hei hi US leh khawthlang ram ṭhenkhatte chuan an pawmsak nghal a ni. 

Politics buaina an tawh mek vangin kar kalta Inrinni khan Spain, Britain, France, Netherlands leh Germany chuan Maduro hian ni riat chhung inthlan a buatsaih lo a nih chuan Guaido chu interim president atana an pawm tur thu an sawi. 

Maduro chuan Europe ram hruaituten hriattirna an pek hi an sut leh tur a ni tiin, tumahin an ram inrelbawl danah inrawlh an tum tur a ni lo, a ti. Venezuela chu Europe-a innghat a ni lo tih sawiin, European ram hruaitute thiltih chu awmze nei lo leh an tihsual a ni, a ti. 

Roman Catholic kohhran hruaitu Pope Francis pawhin Venezuela tualchhung buaina chu boruak ṭha tak hnuaia chinfel a nih a, mihring dikna chanvote humhalh a nih theihna turin a ṭawngṭai sak tih Pathianni khan a sawi bawk. 

Hun rei tak tualchhung buaina an tawh hian Venezuela sum dinhmun pawh a nghawng nasa tawh hle a, thil man pawh a sang chak hle a, ni 19 danah thil man hi a let zelin a sang anga chhut a ni. Internal Monetary Fund chuan an ram dinhmun hi siamṭhat a nih thuai loh chuan kumin chhunga thil man sanna hi 10,00,000% chuang a tling thei dawn niin a sawi.