France-ah 'red scarf'-ten kawng zawh ve leh

France sorkar laka lungawi lohna lantirtu, 'yellow vest' tihte chuan kar 11 chhung zet kar tawpa nawrh an huaihawt tawh a, hetihlai hian yellow vest-te chet dan duh loin 'red scarf'' intite chuan Pathianni khan Paris-ah kawng an zawh ve leh. 

Yellow vest-ten hun rei tak sorkar laka nawrh an huaihawtnaah hian tharum thawhna pawh a thleng nasa hle a, sorkar lam chuan an nawrh huaihawt ṭanna ber, tuialhtheia chhiah lak tihsan a tumna chu ṭhulh tawh mah se sorkar policy danga lungawi lohna an lantir chhunzawm reng a ni. 

Pathianni khan 'red scarf' tihte hian Paris-a Place de la Nation square aṭangin Bastille monument thlengin kawng an zawh a, France leh European Union flag-te an keng bawk. Kawngzawh zinga tam tak chuan Yellow vest-ten France rama miretheite dinhmun chawikan an phutna chu an dodal lo tih an sawi a, hemi rual hian nikum November thla aṭanga an nawrh huaihawt vanga buaina chhuak leh thil tihchhiat thleng fo chu an ning tawh tih an sawi.