Invest Myanmar Summit 2019 hmang

Myanmar khawpui, Nay Pyi Taw-ah nimin khan ni hnih awh tur Invest Myanmar Summit 2019 chu hman ṭana ni. He hunah hian ramchhung leh rampawn lama investor-te tan Myanmar rama investment tih theihna tur hrang hrang ngaihtuah a ni ang. 

He summit hi Union of Myanmar Federation of Chambers of Commerce and Industry (UMFCCI), Myanmar Investment Commission (MIC) leh Directorate of Investment and Company Administration (DICA) huaihawt a ni a, sumdawngte leh regional government official-ten an state leh bial-a sumdawnna kalpui a nih theih dan tur sawihona tur hun siamsak an ni bawk. 

State Counselor Aung San Suu Kyi-i chuan summit hi hawngin, Myanmar-in Sustainable Development Goals tihhlawhtling tura a inpek thute a sawi a, an ramin kawng hrang hranga hma an sawn dante a sawilang bawk. 

UMFCCI President U Zaw Min Win pawhin state leh region tina investor-te tana project an hawn zingah Mandalay region-a Myaotha Industrial Park City siamna tur pawh a tel thu a sawi a, hemi hmang hian hna 33,700 siam a ni dawn tih a sawi.