Al-Shabab-te'n US sipai pathum an that

Kenya rama Lamu region-a US sipai hmun, Camp Simba-a Somalia Islamist firfiak pawl, Al-Shabab-te'n Pathiannia beihpui an thlakah khan US sipai pathum an thi tih Kenya Defence Forces (KDF) thupuangtu Colonel Paul Njuguna chuan nimin khan a sawi.

Al-Shabab-te hian US indo thlawhtheihna leh lirthei eng emaw zat an tichhia bawk. US sipai an thahte hi sipai pangai pakhat leh defence contractor pahnih an nih thu tarlan a ni. Midang pahnih an hliam bawk.

"Thi te leh an chhung te hi kan ṭawngṭainaah kan hre reng a, kan tawrhpui tak zet a ni." tiin US Africa Command (Africom) head General Stephen Townsend chuan thite an tawrhpui thu a sawi..

Al-Shabab hel te hi Al-Qaida firfiakte nen an inzawm nia hriat a ni. Pathiannia inbeihna thlengah hian Al-Shabab mi panga an thi ve bawk. Hetihlai hian Al-Shabaab lam hian US mi 17 leh Kenya sipai 9 an thah thu an tarlang ve thung. Kenya police-te chuan he inbeihna thlengah hian US leh Kenya thlawhtheihna pakhat ve ve a chhiat thu leh, US helicopter pahnih a chhiat thu an tarlang a ni.