State of the Union address nei turin Trump sawm

US House Speaker Nancy Pelosi-i chuan President Donald Trump chu February 5-a State of the Union speech nei turin a sawm niin Pelosi-i deputy chief of staff  Drew Hammill chuan a sawi.

Pelosi-i hian President Trump chu lehkha thawnin, January 23-a lehkha a thawnah khan sorkar shutdown tihtawp a nih hunah thu sawina hun tur hi an la ngaihtuah dun ang tih a lo hrilh tawh a, Thawhṭannia an sawidun leh hnuah February 5 chu an remti dun ta tih a sawilang a ni. Hei vang hian February 5 hian House Chamber-a Joint Session of Congress hmaah State of the Union speech nei tur hian a sawm tih a hrilh a ni. 

House Speaker hian January 29-a Congress-a thu sawi turin President Trump hi a lo sawm tawh a, mahse a hnuah sorkar shutdown chhunzawm reng a nih vangin venhimna kalpuina tur chungchangah sum duh ang a awm loh vangin thusawi hun hi sawnhla turin a ti leh a ni. 

Nikum December 22 aṭang khan US sorkar hi shutdown a ni tawh a, Thawhṭanni thleng khan ni 38 chhung shutdown a ni tawh. Hnathawk mumal thei loin sorkar department eng emaw zat  hun rei tak an awm tawh a, sorkar hnathawk 80,000 chuang chu hlawh la thei loin an awm bawk. Ni 38 chhung zet sorkar shutdown a nih vanga US-in sum a hloh hi dollar tluklehdingawn 11 zet a tling tawh niin Congressional Budget Office (CBO) chuan a tarlang. 

President Trump hian kar kalta Zirtawpni khan February 15 thlenga sorkar sum mamawh pekna tur bill a sign a, hemi chhung hian ramri hungna bang siam tum chungchangah White House leh Democrats lam chuan inremna kawng zawngin inbiakna an neih leh dawn a ni.