Malaysia-in intihsiak-na a thlen tur a hlihsak

Malaysia-in 2019 World Para Swimming Championships a thlen tur chu Israel infiammite tel ve a phalsak loh avangin hlihsak a nih tih International Paralympic Committee (IPC) chuan a sawi. 

Muslim ram, Malaysia hian Palestinian-te chung-ah Israel chet dan duh lohna lantir nan an rama intihsiakna thlen turah Israel infiammite chu an tel ve a remti lo a ni. He Championsphip hi kumin July 29 aṭanga neih ṭan tur a ni. 

IPC president Andrew Parsons chuan intihsiakna thlengtu tur ramin politics thil avangin ram dang infiammite telh a remtih loh chuan an tan a thlengtu tur ram dang zawn leh mai loh chuan tih theih dang a awm lo tih a sawi. World Championships chu eng ram pawha infiammite tan intihsiakna him leh zalen, inthliarhranna awm lohna tur a ni, a ti. 

Kum 2017 khan Paraly-mpic Council of Malaysia chuan Kuching-a World Championship an thlen turah infiammi tel thei tur chu an vaiin zalen taka intihsiaknaa tel phalsak an ni dawn tih a lo tiam tawh tih a sawi. Mahse Malaysia ram thuneitu an inthlak tak avangin sorkar thar chuan ngaihdan dang a rawn nei ta a ni, tiin Parsons chuan a sawi. 

Politics leh infiamna chu chawlhpawlh chi a ni loh tih sawiin, Parsons chuan Israel infiammite Malaysia-a tel phalsak an ni ve lo chu pawi an ti hle tih a sawi bawk.