Venezuela court-in eptu hruaitu an ram chhuahsan khap
Venezuela Supreme Court of Justice (TSJ) chuan an ram president lailawka inpuang, eptu pawl hruaitu Juan Guaido chu an ram a chhuahsan a khap a, a thil neihte pawh khawih chet theih lohin a hreksak bawk.
Attorney General Tarek William Saab-an court hnenah Guaido laka fimkhur tur leh an ram a chhuahsan theih lohna tura ruahmanna siam tura a ngen thu a sawi hnuah, Thawhlehni khan TSJ hian he thupek hi a tichhuak a ni.
Saab chuan TSJ-a ngenna a siam hi January 22 aṭanga an rama tharum thawhna thleng hrang hrang kaihhnawiha Guaido chhuina kal mek nena inzul a ni tih a sawi.
Hetihlai hian US National Security Adviser John Bolton chuan Saab-a ngenna siam chungchang hi chhangin, democracy palzut leh Guaido tihnat tumte lakah nghawng pawi tak a awm tur thu a sawi a ni.
Nikum May thla khan Nicolas Maduro chu Venezuela President atan thlan nawn niin, vote tla aṭangin 67.84% zet a hmu pha a, kumin January 10 khan kum ruk term chelh turin lakluh a ni. Hetihlai hian nikuma inthlan buatsaihah khan eptu hruaitu eng emaw zat chu inthlan chuh khapsak an nih bakah tam tak jail-ah tantir an ni bawk a, hei vang hian eptu lam chuan he inthlan hi an pawm lo tih an sawi.
National Assembly-a hotu, Juan Guaido chuan Mauro kaihhruai sorkar chu dan kalha din a ni tih sawiin, January 20-a sorkar laka lungawi lohna lantira rally an neihah an ram president lailawk, interim president-ah a inpuang a ni.
US, Brazil leh ram ṭhenkhat dangte chuan Guaido chu Venezuela president atana an pawm thu an sawi nghal a, hei vang hian President Maduro chuan US nena an inzawmna pawh a tichat nghal a, an rama US palaite chu chhuak tura a hriattir bakah, US-a Venezuela palai pawh a ko haw nghal bawk.
Europe ram paruk Britain, France, Germany, Netherlands, Portugal leh Spain hruaitute pawhin Maduro chu inthlan buatsaih turin an nawr mek bawk a, February 3 thleng hun pein inthlan hi buatsaih a nih loh chuan Guaido chu Venezuela ram president-a a pawm ve tur thu an sawi.
Thawhṭanni khan US chuan Venezuela sorkar hnuaia oil company lian, Petroleos de Venezuela hrekna tur a siam. He company hi Venezuela in a sum lakluhna pui ber pakhat a ni a, hei vang hian Maduro-a nawrna atan US chuan company hrekna hi a siam a ni.