Brazil 'dam' chim vangin engineer-te man

Brazil chhimchhak lam, Minas Gerais state-a mining company lian, Vale tuikhuah (dam) chim vangin Thawhlehni khan thawktu mi panga man an ni a, an zingah engineer pahnih an tel a, geologist pakhat  leh manager pahnih an tel bawk. 

Vale-a thawkte manna tur thupek tichhuaktu, Judge Perla Saliba Brito chuan geolosgist leh engineer-te hian dam hi a him tawk a ni tih leh, a siamna kawngah pawh dan zawm a nih thu report-naah an hming an sign a, manager-te chu dam awmna complex hman a nih theihna kawngah mawh an phur niin a sawi bawk. 

Kar kalta Zirtawpnia dam chim vanga thi mi 84 ruang chu hmuh a ni tawh a, chin hriat lohin mi 276 an la awm mek. Heng mite zawn hna hi thawh chhunzawm zel a la ni. Thi zinga a tam ber hi Vale-a thawkte an ni.