Bangladesh factory-a thawk 5,000 dawn ban

Bangladesh rama thawmhnaw siamna factory-a thawkte chuan an hlawh chungchanga lungawi loa nawrh an huai-hawt avangin  hnathawktu zinga 5,000 dawn chu ban an ni tawh.

Factory-a hnathawkten hlawh tihsan phuta nawrh an huaihawtnaah hian tharum thawhnate thlengin, mi pakhat a thih bakah mi 50 chuangin hliam an tuar a ni. Police-te chuan nawrh huaihawtte hnawhdarh tumin rubber bullet leh tear gas-te an hmang a ni. 

Police-te chuan factor worker-te hian nawrh an huaihawt chhung hian thil tam tak tichhiain thil an ru bawk niin an sawi a, hnathawktu 4,899 chu buaina siam vang hian ban an ni tawh a ni, an ti. Hetihlai  hian hnathawktu pawl lam chuan ban tawk hi 7,000 dawn an tling tawh niin an sawi thung. 

Bangladesh-ah hian thawmhnaw siamna, clothing factory 4,500 vel zet a awm a, hnathawktu maktaduai 4.1 vel an awm bawk. China dawta thawmhnaw lam thawnchhuaktu lian ber a ni a, Bangladesh-in rampawn aṭanga a thil thawnchhuah aṭanga a sum hmuh 80% dawn hi thawmhnaw thawnchhuah aṭanga a hmuh a ni.