US-in Myanmar sipai hotute a hrek dawn

Myanmar sipaiten civil sorkar thuneihna an hnehchhuh hnuah, US sorkar chuan Myanmar sipai hotute, an chhungte leh inzawmna an neihpui sumdawng liante hrekna tur a siam.

US President Joe Biden chuan civil sorkar paihthlatu sipai hruaitute hrekna tur hi order siam hi a pawm tawh a ni. President Biden chuan Myanmar sipaite chu civil sorkar hnenah thu­neihna pe kir tur leh, Aung San Suu Kyi leh civilian leader dang an mante chhuah turin a ti. A ṭul a nih chuan hma an la chhunzawm zel dawn tih sawiin, Myanmar rama thil thleng chu khawvelin a thlir mek a ni, a ti. 

Hrekna an siam chu tun kar aṭangin hman ṭan nghal a ni dawn tih sawiin, export lam pawh an thunun chhoh tur thu a sawi. "Burma sorkarin US-a a thil neihte chu khawih chet theih lohin kan siam dawn. Hetih lai hian healthcare, society group leh Burma mipuite hamṭhatna dawn tur chungchangah erawh kan theihtawpin kan thlawp zel ang," tiin Biden chuan a sawi. 

United Nations human rights body chuan vawiin hian Myanmar sorkar paihthlak a nih chungchang demna leh thil awmdan enfiah tur phutna chungchanga Britain leh European Union-in resolution an duan chu a ngaihtuah dawn. 

Hetih lai hian Myanmar sipaite nena inzawmna ṭha tak nei, China leh Russia chuan resolution hi an dodal emaw, a nem zawka siam tur emaw an tum ngei rin a ni thung. 

Myanmar mipuite chuan sipaite chet dan duh lohna lantirin nawrh an la huaihawt chhunzawm zel a, hemi rual hian sipaite pawhin official an la man belh zel bawk. Sipaiten an man thar zingah hian election commission-a thawk leh local goverment official-te an tel. 

Thawhlehnia Nay Pyi Taw-a nawrh huaihawtte hnawhdarhna atana police-ten rubber bullet an kahchhuahin a fuh, Mya Thwe Thwe Khaing, kum 20 mi chu a dinhmun a ṭha lo hle a, intensive care-ah dah mek a ni.