WHO team-in lab aṭangin Covid-19 darh nia sawi pawm lo
Covid-19 hri lo chhuahna leh a darh dan zirchiang tura China rama kal, World Health Organisation (WHO) expert team chuan Wuhan-a laboratory aṭangin coronavirus hri hi a darh ṭan nia sawi chu an pawm lo tih an sawi.
WHO team hian an zirchianna hi an zo tawh a, Thawhlehni khan Wuhan-ah press conference neiin, an zirchianna neih chungchangte an sawi a ni.
Expert team hotu, Danish food safety expert Peter Ben Embarek chuan coronavirus research neihna lamah Covid-19 hi laboratory aṭangin tihpalh thilin a darh chhuak nia sawi chu a pawmawm loh thu leh, hemi chungchang chu chhuizui zel tlaka a ngaih loh thu a sawi.
Embarek chuan an thil hmuhchhuahte aṭangin khawvel puma leng mek, Covid-19 hrik chu bak aṭangin ransa dangah, chumi hnuah mihringah a lo darh nia sawi chungchang erawh thil ni thei, zirchian zui tlak nia a ngaih thu a sawi a ni. Hei bakah hian hri darh ṭanna hi frozen food pawh a ni thei tih a sawi bawk.
WHO team in a thil hmuhchhuah hmasa chungchanga report a siam hi US chuan a pawm lo tih a sawi nghal a, expert team data hman chu zirchian ve phawt a duh tih a sawi. White House press secretary Jen Psaki chuan WHO team-in China rama zirchianna an neih chungchangah US sorkar chu a inrawlh ve lo tih sawiin, expert team thil hmuhchhuah leh data hmante chu a hrana ennawn ve leh phawt an duh tih a sawi ve bawk.