MP-in necktie awrh duh loh vangin New Zealand Parliament-in dress code thlahdul

New Zealand Parliament member pakhat, Maori hnam hruaitu Rawiri Watiti chu Thawhlehni khan chamber chhungah necktie a awrh duh loh avangin chhuah tir a ni a, mahse he thil thlen tukah a thu sawi phalsak leh a ni a, Parliament-a mipa tana dress code a siam pawh thlahdul zui a ni bawk. 

Maori MP Waititi hian necktie chu khawthlang lam ram inchei dan a ni tiin, Parliament chhunga awrh luih tir an tumna chu a dikna chanvo palzut sakna leh indigenous culture nekbeh tumna niin a sawi. Thawhlehnia debate neih dawnah necktie awrh loin, an hnam ṭhi 'toanga' zawk a awrh a ni. 

House aṭanga Watiti chhuah tir a nih chungchang hian sawizui a hlawh hle a, mahse a tukah chamber-ah a thu sawi hi phalsak leh nghal a nih bakah, House chhunga mipa ten necktie an awrh ngei tih dan pawh thlahdulin, an duhthlannaah dah a ni ta a ni. 

Speaker Trevor Mallard chuan Standing Orders Committee nena meeting an neih hnuah,  necktie awrh leh awrh loh chu mimal duhthlanaah an dah tak thu a sawi. New Zealand Parliament, member 120 awmnaah hian member zahve dawn chu hmeichhia an ni a, LGBTQI 11% awmin, Maori hnam aiawh 21% an awm bawk. A vawi khatna atan African origin leh Sri Lankan origin MP an nei bawk.