Ruah sur mah se kangmei nasa zawk chhuak thut thei

Nikum kum chawhnu lam aṭanga ram kang nasa tak tuartu  Australia-ah chuan Pathianni khan ruah a sur hlauh mai a, social media velah pawh ruahsur vanga lawmna thu post hmuh tur a tam hle. Mahse Pathianni zanah khan official-te chuan kangmei nasa zawk a la chhuak leh thut thei tih an sawi thung.

New South Wales (NSW) state Premier Gladys Berejiklian chuan nimin zing khan lawmna hun a la nih loh thu sawiin, insenghawina hun a nih thu a sawi. Ruahsur chu hmun him lama insawn hun a nih mai thu a sawi a ni.

State official-te chuan Ninga­ni vel aṭang hi chuan khua a lum chho leh dawn tih sawiin, kang­mei pawh nasa takin a chhuak leh thei tih an sawi bawk. 

Australia khawchhuak lam tuipui kam, Sydney leh Mel­bourne inkar velah ruah hi a sur a, NSW lamah pawh a sur bawk a ni. Hemi avang hian nimin lam kha chuan emergency warning pekchhuah a ni lo a, chhawmdawl hna leh kangṭhelh hna erawh nasa taka thawh mek reng a la ni thung. Thla nga vel zet chu Australia hian ram kang hi an tuar tawh a, mi 24 an thih tawh bakah ramsa nuai tam tak an thi tawh a ni. Canada, France leh United States sorkarte chuan Australia ṭanpui an inhuam thu hi an sawi tawh bawk.