Maduro-an amah thahna tur thupek siamah Trump a puh

Venezuela President Nicolas Maduro chuan US President Donald Trump chuan amah that turin an ṭhenawm, Colombia sorkar chu thu a pe niin a sawi. 

Russia RIA agency in an kawmnaah Maduro chuan Europe ram hruaituten inthlan buatsaih tura an nawrna chu a hnawl thu a sawi a, hemi rual hian eptu hruaitu leh acting president-a inpuang Juan Guaido manna tur thupek a siam lo tih a sawi. Venezuela chuan Russia leh China laka bat a neihte a hrereng dawn tih a sawi bawk a ni. Maduro chuan nikuma inthlan buatsaihah vote 68% hmuin, dan ang taka an ram hruaitu atana thlan a ni tih a sawi. Ramdangte chuan inthlan buatsaih tura an duh a nih chuan kum 2025 thleng lo nghak mai turin a ti. 

Kum 56 mi, Maduro chuan an ram sipaite chu a lakah an rinawm reng tih a sawi a, Russia President Vladimir Putin pawhin a thlawp tlat thu a sawi. Guaido-an acting president-a a inpuanna US  leh ram ṭhenkhatten an pawm hnuah Venezuela tualchhung politics buaina hi a zual zel a, Venezuela Supreme Court chuan Guaido hi an ram chhuahsan a khapsak bakah, a thil neihte khawih chet theih lohin a  hrensak bawk. 

Russia hi President Maduro thlawptu niin, kum 2006 aṭang khan Venezuela hi dollar tluklehdingawn 17 zet a puktir tawh a ni. 

Maduro chuan, "Donald Trump hian rinhlelh rual lohin min thahna tur thupek a siam a ni, Colombia sorkar leh Colombian mafia-te hnenah min that turin a hrilh a ni", a ti. A chunga eng thil pawh a thleng a nih chuan Donald Trump leh Colombia President Ivan Duque chu a mawhphurtu a nih tur thu a sawi. US leh Colombia chuan Maduro-a puhna hi an pha thung.