Hong Kong-ah mi mtd 1.7-in kawng zawh

China-in nawrh huaihawt chhun­zawm tawh lo tura a vau chungin, Pathianni khan Hong Kong-ah democracy thlawptute chuan kawng­zawh lian tham tak an buatsaih lui leh. 

Pathiannia kawngzawh huai­hawtah hian mi maktaduai 1.7 zet an tel tih a buatsaihtu, Civil Human Rights Front chuan an sawi. Ṭum dang ang lo takin boruak muanawm tak hnuaiah kawngzawh hi neih a ni a, police leh pungkhawmte inkarah innawr buaina pawh a thleng lo nia sawi a ni. 

Sorkar thupuangtu chuan boruak muanawm tak hnuaiah kawngzawh hi huaihawt ni mah se, traffic erawh a tibuai hle tih sawiin, nunphung pangngaia awm leh vat chu thil pawimawh tak a nih thu a sawi. 

Hong Kong-a nawrh huaihawt bul ṭanna chu sorkarin thiam loh chantirte mainland China-a thawn theihna tur, Extradition bill siam a tum vang a ni. Mahse hei hi duh loin mipuiten hun eng emaw chen lungawi lohna an lantir hnuah, Chief Executive Carrie Lam chuan bill hi tihtawp a ni thu a sawi.

Hemi hnu pawh hian mipuite chuan nawrh hi titawp mai loin, sorkar laka an lungawi lohna leh an thil phutte lantirna turin kartawp Nawrh hi kar 11 chhung zet an huaihawt tawh. Sorkar laka an thil phut zingah extradition bill ṭhiah, June 12-a nawrh huaihawt sawina atana sorkarin 'intualvuakna' tia a sawi chu sut tur te, nawrh huaihawt mante ngaihdam vek, police-te chetdan chhui chian leh Hong Kong chief executive leh Legislative Council thlanaah zalen taka vote thlak theihte a tel.