UK Prime Minister Johnson-a'n Berlin leh Paris a tlawh dawn

United Kingdom prime minister Boris Johnson chuan European Union aṭanga Britain inlakhranna tur, Brexit chungchang sawipui turin Germany leh France hruaitute a hmu dawn.

Nilaini hian Berlin-ah kalin, German Chancellor Angela Markel a hmu dawn a, Ningani-ah Paris-ah France President Emmanuel Macron a hmu leh ang. Inrinni hian Frence resort, Biaritz-ah ni hnih awh tur, G7 summit neih turah a tel nghal dawn bawk. 

EU aṭanga Britain inlak­chhuah hun tur hi ṭum eng emaw zat tihkhawtlai a nih hnuah October 31 ruat a ni. Johnson chuan hun bi ruatah hian EU nena inremna an siam thei lo a nih pawhin eng kawng pawha inlakchhuah tho a ni dawn tih a lo sawi tawh a ni. Hemi rual hian inremna siam thar a nih leh theihna tura inbiakna nei turin EU hotute hi nawr zel a tum thung. 

Pathianni khan Boris John­son kaihhruai sorkar chuan European Communities Act ṭhiahna tur thupek a tichhuak. He thupek hi Ocotber 31 aṭangin hman ṭan a ni ang. European Communities Act hi UK-in European Economic Community a zawm theihna leh, an rama EU law-te hman theihna a ni a, kum 1972 khan siam a ni. He Act ṭhiah hian an dan leh thupekte chu anmahni kutah ngei an la let leh thei dawn tih Brexit Secretary Steve Barclay chuan a sawi. 

Hetihlai hian Parliament-ah Brexit chungchang hi sawiho a nih theihna turin PM Johnson chu chawlh hmang mek MP-te pawh ko let tura nawr a ni. MP 100 chuang chuan Johnson hi lehkha thawnin, "Kan ramin economy lamah harastna kan hmachhawn mek a, national emergency kan tawh mek avangin Parliament inkhawm koh thuai a ngai a ni," an ti.