Myanmar hmarlamah hel leh sipaite inbei

Myanmar hmarlam, Shan state-a Kutkai khua chu Pa­thian­ni khan helpawl pathum inthurualten an bei a, sipaiten helho hi an lo bei let a ni. 

Defence Services thuchhuah chuan Kutkai khaw beitute hi Northern Alliance armed group pathum - Arakan Army (AA), Ta'ang National Liberation Army (TNLA) leh Myanmar National Democratic Alliance Army (MNDAA) member-te an ni tih a sawi. Heng pawlte hian chhim thlang lam aṭangin khua hi an bei a ni. 

Helho hian Inrinni zan khan Lashio-Hsenwi-Kunlong high­way-a Nartee khaw luhna lei chu an tichhe bawk a, he khua hi kalpawh theih lohin an awm mek. August 15 aṭang khan helpawl pathum ṭangrual hian Mandalay leh Shan state-a hmun panga an bei a, mi 15 thatin midang 13-in hliam an tuar bawk. Thi zingah hian civil mi pathum, police pathum leh sipai pakua an tel a, hliam tuar zingah civil mi 10 an tel bawk. Helho hian Nawngkio khuaa police outpost, toll gate, narcotic checkpoint leh local battalion headquarters-te an bei bawk. 

Sipaite chuan July 25-28 khan Kutkai khuaa ruihhlo an siamna camp an tihchhiat sak avangin an rawn bei let niin an sawi. Pathiannia Kutkai khaw beitute hi lo kap letin, hel eng emaw zat an thi tih an sawi bawk. Hetihlai hian Mynmar sorkar chuan helpawl hrang hrangte chu inkahhai a puan chhung ngeiin inremna kawng zawnga inbiaknaah tel turin a ti. Inkahhai a puan hi August 31 hian a tawp tawh dawn a ni.